الليل و الضجر .

الليل و الضجر ..

حملت الملل و الليل ساكت ما حرك
لكن سألني: شو جرى وشو حيَّرك؟

و قال لي: فؤادك صوبها لما نحر
ما اهتم حتى يسألك ، ما خيَّرك

وقال الهوى شدّك بساعات السهر
وريح الهوى يا صاحبي اللي سيّرك

قلت: الهوى جبار ، جلاّب الضجر
و يمكن بعد عنو الشِعر ما أخبرك

لو كان قلبك من صخر يمَّا حجر
ما كان عّ لوعة سنينك أجبرك

وما عشت لهفة بس تا تسمع خبر
و ما كان في احساس عالي صبّرك

*****
داء الهوى يا صاحبي سرو غميق
رفيق الصبر ما بيتعب ان طال الطريق

بتخلط البسمة بالالم عند اللزوم
و بتخاف لما تفيق ، ما تلاقي الرفيق

بتحب!؟ ليش تحط عّ كتافك هموم
وتمشي بعتم العمر ، بالعتمه غريق

وشمس العمر بتكون غابت بالغيوم
و بتضيِّع سنينك ( اذا) حق الحقيق

و لو شفت بارقة الأمل فوق التخوم
مش كل لمعه بتنحسب لمعة عقيق

تذكر ، سراب العمر آخرتو وجوم
و ما في سراب انعد للشاعر صديق

*****
فحوى كلامك اورد بفكري سؤال
قل لي بصراحه شو قصدت بهالمقال

بشْعر معك ، متلي الهوى تمنيت
لكن حسابك ، ليش ناقص احتمال ؟

منصاب في داء الهوى و خبيت
سرك عرفتو و للهوى تارك مجال

فضت بعواطف حب شو خليت؟
لأهل الهوى تا نقول حالك غير حال ♥
خطوط الحمر ما شفتها تعديت !!
و لولا الشمس ما شفت انوار الهلال

تمنيت ! شو تمنيت تا تكفي الطريق
وحدو التمني خيال من وحي الخيال